Кыргызстандын Саламаттык сактоо министри Дамир Осмонов И.К. Ахунбаев атындагы Кыргыз мамлекеттик медициналык академиясынын 6-курсунун студенти Адинай Кабенова менен жолугушуп, ага Саламаттык сактоо министрлигинин Ыраазычылык катын тапшырды.

Мекеменин маалыматына караганда, 3-августта Адинай Кабенова жол-транспорт кырсыгына күбө болгон. Анын туура жана өз убагында жасаган аракеттеринин аркасында тез жардам бригадасы келгенге чейин жабырлануучунун өмүрүн сактап калууга мүмкүн болгон.

Саламаттык сактоо министрлигинин башчысы студентке кесипкөйлүгү, чечкиндүүлүгү жана кайдыгер эместиги үчүн ыраазычылык билдирди.

«Медицинада билим чоң мааниге ээ, бирок адамгерчилик, жоопкерчиликти өз мойнуна алууга жана эң оор учурда жардамга келүүгө даяр болуу да андан кем эмес маанилүү. Адинай өзүнүн бул аракети менен келечектеги дарыгер наамын алып жүрүүгө бүгүнтөн баштап эле татыктуу экенин далилдеди. Көрсөткөн ушул үлгүсү үчүн ага чын жүрөктөн ыраазычылык билдирем», — деди Дамир Осмонов.