Өзбекстандын президенти Шавкат Мирзиёев өлкөдө экинчи атомдук электр станциясын куруу долбоору боюнча даярдык иштерин баштоо пландалып жатканын билдирди. Бул тууралуу ал Хорезм облусуна болгон жумушчу сапары учурунда айтты.

Президенттин айтымында, ишенимдүү энергия менен камсыздоо жана электр энергиясынын өздүк наркын төмөндөтүү чет элдик инвестицияларды тартуу жана өлкөнүн 2030-жылга чейинки өнүгүү стратегиясын ишке ашыруу үчүн зарыл.

Болочок станциянын параметрлери азырынча ачыктала элек. Тактап айтканда, анын кайсы жерде курулары, кубаттуулугу жана курулуш мөөнөттөрү азырынча белгисиз.

Өзбекстандын биринчи атомдук долбоору учурда Жизак облусунун Фариш районунда ишке ашырылып жатат. 4-июнда Өзбекстандын президенти Шавкат Мирзиёев менен Россиянын президенти Владимир Путин видеоконференция аркылуу биринчи энергоблоктун курулушун башташкан. Курулуш аянтында болочок станциянын пайдубалына «биринчи бетон» куюлган.

Долбоор эки ВВЭР-1000 энергоблогун жана эки РИТМ-200Н реакторун камтыйт. Станция долбоордук кубаттуулукка чыккан соң жылына болжол менен 15,4 млрд кВт⋅саат электр энергиясын өндүрөт деп күтүлүүдө. Бул өлкөнүн электр энергиясына болгон керектөөсүнүн 15%дан ашыгын жабууга мүмкүндүк берет.