.svg){kind=logo}
Сүхэ-Батор көчөсүндө бак-дарактар эмнеге куурап жатат: тургундар жана «Бишкекжашылкурулуш» эмне дейт?
«Элдик репортерго» Сүхэ-Батор көчөсүндөгү № 31 үйдүн тургундары кайрылып, «Сария» кафесинен Юнусалиев көчөсүнө чейинки тилкедеги жашыл көчөттөрдүн аянычтуу абалы тууралуу айтып беришти.
Кайрылуу ээсинин айтымында, бул тилкеде сугат жок, ал эми арыктагы суу «Шинный центр» менен «Сария» кафесине чейин гана келет.
«Арыктын кайсы жери бүтөлүп же бетондолуп калганы белгисиз, бирок суу андан ары өтпөйт. Светофор тараптан да суу келбейт. Ирригация бузулган, кайсы жерден экени түшүнүксүз. "Сариянын" жанындагы бактар да сугарылбайт, түбү бетондолуп, куурап баратат. Милиция кафеге кальян үчүн гана келип айып пул салат, ал эми бактарга эч кимдин иши жок. Липа (жөкөрү) дарактары отургузулган, бирок алар деле нормалдуу сугарылбайт. Эки аптада бир жолу келип, бактарга суу чачымыш этип коюшат. Чөп жок, бадал жок. Үйдүн тургундарына суу түтүгүнөн (крандан) суугарууга болбойт — дароо контролёр келип айып салат, ал эми арыкта суу болбойт», — деп айтылат маалыматта.
Автор белгилегендей, «быйыл Бишкек шаардык кеңешинин депутаттары, акимиаттын жана МТУнун (муниципалдык аймактык башкармалык) өкүлдөрү келип, куру убадаларды берип, бирок эч нерсе кылышкан жок».
«Бак-дарактар куурап бүткөн, азыр каалаган учурда унаалардын же өтүп бараткан адамдардын үстүнө кулап түшүшү мүмкүн. Ал эми байкуш ичке липа көчөттөрү кантип араң турганы белгисиз. 7-кичи район тарапта көптөгөн коммерциялык объекттер бар, алар унаа токтотуучу жай үчүн баарын асфальттап, чөптөрдү, бадалдарды, бак-дарактарды жок кылышкан. Мындай ысыкта жалаң бетон. Жөө басууга мүмкүн эмес», — деп жазышат шаардыктар.
«Бишкекжашылкурулуш» муниципалдык ишканасынын Октябрь району боюнча тилке башчысы Алмазбек Шералиев Reporter.kg басылмасына түшүндүргөндөй, бул аймакты сугаруу графикке ылайык жумасына эки жолу мотопомпанын жардамы менен жүргүзүлөт.
«Болгону өткөн аптада 40 градустан ашкан аномалдуу ысык болуп, мунун кесепетинен айрым бак-дарактарды күн карып кетти», — деди Шералиев.
Тургундардын айтымында, ирригация системасы бузулгандыктан арыкта суу жок болсо, мотопомпа менен сугаруу кантип жүзөгө ашырылууда деген кабарчынын суроосуна жетекчи жооп берди. Ал арык тармагы иштебейт деген маалымат чындыкка дал келбестигин айтып, өз сөзүн тастыктоо үчүн видео жөнөттү.
Анара Мамытова
