Күн ысыганы дарыялардын, көлдөрдүн жана башка суулардын жээгинде эс алууну тандаган кыргызстандыктардын саны көбөйүүдө. Бишкектеги Ден соолукту чыңдоо борбору сууга түшүү белгилүү бир тобокелдиктер менен коштолорун эскертип, сактык чараларын сактоого чакырды.

Адистердин айтымында, белгиленген талаптарга жооп берген жана атайын жабдылган эс алуу жайлары гана коопсуз болуп саналат. Бирок, расмий пляждарда да коопсуздук көбүнчө эс алуучулардын эң жөнөкөй эрежелерди сактоосунан көз каранды.

Борбордун адистери тыюу салуучу белгилери бар жерлерде сууга түшпөөнү жана чумкубоону, калкыгычтардан (буйлардан) жана башка тосмолордон ары сүзүп кетпөөнү, кайыктарга, катерлерге жана башка сүзүүчү каражаттарга жакын барбоону, ошондой эле тааныш эмес жерлерде жана атайын ылайыкташтырылбаган курулмалардан сууга секирбөөнү сунуштайт.

Мындан тышкары, адистер мас абалында сууга түшпөөгө, сууда коркунучтуу оюндарды ойнобоого, балдарды чоңдордун кароосуз калтырбоого жана сууга түшүү үчүн унаа камераларын, үйлөмө матрацтарды жана куткарууга арналбаган башка каражаттарды колдонбоого чакырат.

Ошондой эле эс алуучуларга сууга түшүүчү аймакка кайык, катамаран жана башка сүзүүчү каражаттар менен кирбөө, пляжга үй жаныбарларын алып келбөө жана өзүнөн кийин таштанды калтырбоо сунушталат.

Борбордун адистери жөнөкөй эрежелерди сактоо кырсыктардын алдын алууга жардам берерин баса белгилеп, ата-энелерди балдарга сууда өзүн алып жүрүү эрежелерин сөзсүз түшүндүрүүгө жана аларды кароосуз калтырбоого чакырышты.