Министрлер кабинетинин төрагасы Адылбек Касымалиев Талас облусунун түзүлгөндүгүнүн 82 жылдыгына арналган майрамдык иш-чараларга катышты, — деп билдирет министрлер кабинетинин басма сөз кызматы.

Аймактын тургундарынын алдында сүйлөп жатып, ал облустун тарыхый маанисин белгиледи. Анын айтымында, Талас ар дайым тынчтыктын, ынтымактын жана жакшы коңшулаштыктын жери болуп келген, бул жерде кылымдар бою ар кыл элдердин жана маданияттардын өкүлдөрүн сыйлоо салттары калыптанган.

«Кыргыз эли байыртадан эле эр жүрөк жана баатыр эл. Талас — бул Манастын, Чолпонбай Түлөбердиевдин жана Чыңгыз Айтматовдун жери. Бул өзүнүн эрдиги, таланты жана эмгеги менен Кыргызстанды дүйнөгө тааныткан чыгаан инсандарды өлкөгө тартуулаган жер», — деди Касымалиев.

Министрлер кабинетинин башчысы ошондой эле аймакта ишке ашырылып жаткан ири социалдык, инфраструктуралык жана экономикалык долбоорлор тууралуу айтып берди. Анын айтымында, бир катар объекттерди 2026-жылы — Кыргызстандын эгемендүүлүгүнүн 35 жылдыгына карата пайдаланууга берүү пландалууда.

Талас районунда «Манас Ордо» тарыхый-маданий комплексин толук реконструкциялоо иштери уланууда, ал эми Айтматов районунда «Айтматов Ааламы» маданий-мемориалдык комплексинин курулушу жүрүп жатат. Мындан тышкары, Суусамыр — Талас — Тараз эл аралык унаа жолун реконструкциялоо иштери улантылууда. Министрлер кабинетинин башчысы «Бала-Саруу» чакан ГЭСинин маанисин өзгөчө белгиледи.

Жумушчу сапарынын алкагында Касымалиев ошондой эле 11-12-сентябрь күндөрү Таласта өтө турган Кыргызстандын эгемендүүлүгүнүн 35 жылдыгына арналган майрамдык иш-чараларга даярдык көрүү боюнча кеңешме өткөрдү.

Кеңешменин жыйынтыгында мамлекеттик жана жергиликтүү бийлик органдарына майрамдык иш-чараларды жогорку деңгээлде даярдоо жана өткөрүүнү камсыз кылуу тапшырмасы берилди.