Токмок шаарында 73 жаштагы аялдын өлүмүнө шектелип 28 жаштагы И.А. аттуу эркек киши кармалды. Бул тууралуу Чүй облустук ички иштер башкы башкармалыгы билдирди.

Маалыматка ылайык, үстүбүздөгү жылдын 25-сентябрында саат 18:10 чамасында Токмок милициясынын нөөмөт бөлүмүнө Жантаев көчөсүндөгү үйдөн аялдын сөөгү табылганы тууралуу маалымат түшкөн. Окуя болгон жерди кароо учурунда маркумдун денесинде зомбулуктун белгилери бар экени аныкталган.

Бул факт боюнча Кылмыш-жаза кодексинин «Адам өлтүрүү» беренеси менен кылмыш иши козголгон.

Ыкчам-иликтөө иштеринин натыйжасында шектүү 11-октябрда кармалып, Токмок шаардык ички иштер бөлүмүнүн убактылуу кармоочу жайына киргизилди. Учурда кылмыш иши боюнча тергөө уланууда.