Кыргызстандын саламаттык сактоо министридин биринчи орун басары Тилек Мамадалиев жумушчу сапарынын алкагында Ош облусунун Араван районундагы Төө-Моюн айылына барды. Ал жерде жергиликтүү тургундар менен жолугушуп, медициналык жардамдын жеткиликтүүлүгүн жогорулатуу боюнча буга чейин кабыл алынган чечимдердин ишке ашырылышы менен таанышты.

Саламаттык сактоо министрлигинин басма сөз кызматы билдиргендей, үстүбүздөгү жылдын апрель айында президент Садыр Жапаровдун Ош облусуна болгон сапары учурунда айыл тургундары медициналык кызматтардын жеткиликтүүлүгүн жакшыртуу өтүнүчү менен кайрылышкан. Андан соң Төө-Моюндун 20 миңге жакын тургуну Кызыл-Кыя шаардык Жалпы дарыгердик практика борборуна (ЖДПБ) бекитилип, бул жакынкы медициналык мекемеге чейинки аралыкты кыскартууга мүмкүндүк берди.

Мындан тышкары, Мамадалиев медицина кызматкерлерине айыл тургундарына чукул жардам көрсөтүү үчүн колдонула турган жаңы тез жардам унаасын тапшырды. Ошондой эле мекемеге заманбап санариптик флюорограф орнотулду. Бул алдын алуучу текшерүүлөрдүн жеткиликтүүлүгүн арттырып, диагностиканын сапатын жакшыртууга жана көкүрөк тушундагы ооруларды өз убагында аныктоого шарт түзөт.

Белгиленгендей, жакынкы арада Төө-Моюн филиалынын имаратын капиталдык оңдоо иштери башталат. Бул максатта 14 миллион сомдон ашык каражат каралган.

Ошол эле күнү министрдин биринчи орун басары Кызыл-Кыядагы Жалпы дарыгердик практика борборуна барып, анда ишке киргизилген компьютердик томографтын иши менен, ошондой эле башкаруучулук жана каржылык автономияны киргизүү боюнча пилоттук долбоордун жүрүшү менен таанышты.

Долбоордун алкагында ЖДПБ бейтаптарды медициналык кызматтардын жаңы бекитилген прейскуранты боюнча кабыл ала баштады. Ошол эле учурда Саламаттык сактоо министрлиги милдеттүү медициналык камсыздандыруу (ММК) боюнча камсыздандырылган жарандар үчүн медициналык жардам алуу шарттары өзгөрбөгөнүн баса белгиледи.

Мамлекеттик кепилдиктер программасынын алкагында медициналык жардам толук көлөмдө берилүүдө, ал эми тез жардам — ММК полисинин, документтеринин же жарандыгынын бар-жогуна карабастан, абалы турукташканга чейин бардык бейтаптарга акысыз көрсөтүлөт.

Тилек Мамадалиевдин айтымында, жүргүзүлүп жаткан өзгөртүүлөрдүн негизги максаты — мамлекеттик медициналык уюмдардын ишинин натыйжалуулугун жогорулатуу, алардын материалдык-техникалык базасын чыңдоо жана калкты сапаттуу медициналык жардам менен камсыз кылуу болуп саналат.