Бүгүн Кыргыз Республикасынын Шайлоо жана референдум өткөрүү боюнча борбордук комиссиясынын (БШК) жаңы курамынын биринчи отуруму болуп өттү. Бул тууралуу БШКнын басма сөз кызматынан билдиришти.

Отурумду БШКнын жаш курагы боюнча эң улуу мүчөсү Бөдөш Мамырова ачты.

КРнын «КР БШКсы жөнүндө» конституциялык мыйзамына киргизилген өзгөртүүлөргө ылайык, Борбордук шайлоо комиссиясынын курамы эми сегиз мүчөдөн турат. Буга чейин алардын саны 12 болчу.

Ошондой эле мыйзамга ылайык, биринчи отурумда төрага жана анын орун басарлары шайланат.

БШК мүчөлөрүнүн ачык добуш берүүсүнүн жыйынтыгы менен 8 добушка ээ болгон Тынчтык Шайназаров КР Шайлоо жана референдум өткөрүү боюнча борбордук комиссиясынын төрагасы болуп шайланды.

Русланбек Жакышов жана Лейла Лурова бир добуштан БШК төрагасынын орун басарлары болуп шайланышты.