3-июнда Кыргызстанга исламдын ыйык жерлерине ажылык сапарын аяктаган зыяратчылардын алгачкы тобу келди. Сауд Арабиясынан атайын каттамдар менен Бишкек жана Ош аэропортторуна жалпысынан 520 зыяратчы учуп келди, аларды туугандары жана дин өкүлдөрү салтанаттуу тосуп алышты.

Медина — Бишкек каттамы менен борбор калаага келген зыяратчылардын алгачкы тобун (340 адам) Кыргызстандын Азирети Муфтийи Абдулазиз кары Закиров жеке өзү коштоп келди. Дагы 180 зыяратчы Жиддадан Ош шаарына учуп келди. Келгендер Кыргызстан мусулмандарынын дин башкармалыгына (КМДБ) жана уюштуруу штабына сапардын жогорку деңгээлде уюштурулгандыгы жана ар тараптуу колдоо көрсөткөндүгү үчүн терең ыраазычылыктарын билдиришти.

Азирети Муфтий кайтып келген мекендештерге ак батасын берип, кыргызстандык зыяратчылардын калган бөлүгүнүн аман-эсен кайтып келишин тиледи. КМДБ ажылыктын аякташы ар бир момун үчүн рухий жашоонун жаңы баскычынын башталышын билдирерин баса белгилеп, аларды ниеттин жана жасаган иштердин тазалыгын сактоого чакырды.