Бишкекте жаранды жалпы 55 миң долларга алдап кетүүгө шектелип, 21 жаштагы жигит кармалды. Бул тууралуу Октябрь райондук ички иштер башкармалыгы билдирди.

Маалыматка ылайык, милицияга М.Н. аттуу жаран арыз менен кайрылып, ушул жылдын февраль айында белгисиз адам анын ишенимине кирип, алдоо жолу менен «Toyota Avalon», «Kia K7» жана «Samsung» үлгүсүндөгү үч унаасын ээлеп алганын билдирген. Келтирилген материалдык зыян жалпы 55 миң долларды түзгөн.

Бул факт боюнча Кылмыш-жаза кодексинин «Алдамчылык» беренеси менен кылмыш иши козголду. Ыкчам-издөө иш-чараларынын натыйжасында 21 жаштагы Н.А. аттуу шектүү кармалып, убактылуу кармоочу жайга киргизилген. Учурда тергөө иштери улантылууда.