Улуттук коопсуздук мамлекеттик комитети (УКМК) Бишкектеги “Кыргыз азиздер жана дүлөйлөр коому” коомдук бирикмесине таандык жер мыйзамсыз жеке менчикке берилип кеткенин билдирди.

Атайын кызматтын маалыматында, буга чейин коомдук бирикменин менчигинде болгон, Б. Исакеев көчөсүндө жайгашкан 1 гектар жер тилкеси жасалма түрдө бир нече тилкелерге бөлүнгөнү белгилүү болгон. Натыйжада алардын айрымдарына “Пионер” курулуш компаниясы көп батирлүү турак жайларды курган.

Көрүлгөн чаралардын негизинде жалпы аянты 499,08 чарчы метрди түзгөн цоколдук жайлар мамлекеттик баланска кайтарылды.

УКМК мыйзам бузуу менен мамлекеттик менчиктен чыгарылып кеткен активдерди аныктоо жана кайтарып алуу боюнча иштерди улантарын билдирди.