Коррупция фактысы боюнча Кыргызстандын профсоюздар федерациясына караштуу “Кыргызкурорттуризм” башкармалыгынын жетекчисинин А.М.Д. аттуу орун басары  кармалды. Бул тууралуу Улуттук коопсуздук мамлекеттик комитетинин басма сөз кызматы билдирди.

Маалыматка караганда, ал 2012-2021-жылдары “Жалал-Абад” санаторийинин директору болуп турганда кылмыштык схема түзүп, мыйзамсыз акча чыгарган жана өз чөнтөгүн толтурган деп шектелүүдө.

Анын айынан “Жалал-Абад” санаторийине 42 млн сомдон ашык зыян келтирилген. Учурда ал УКМКнын убактылуу кармоочу жайына камакка алынды. Тергөө иштери уланууда.