Алишер Тоотаев Рыспай Абдыкадыров атындагы Ош облустук филармониянын директору болуп дайындалды. Бул тууралуу Маданият, маалымат, спорт жана жаштар министрлигинин басма соз кызматы билдирди.
Маалыматка караганда, Алишер Тоотаев аталган кызматка 20-февралда дайындалды.
Аны эмгек жамаатка министрдин орун басары Чыңгыз Эсенгул уулу тааныштырган. Ал жаңы дайындалган жетекчиге ишине ийгилик каалап, алдыда жасала турган иштер арбын экенин белгилеген.
Алишер Тоотаев 1982-жылы Ош облусунун Кара-Кулжа районуна караштуу Ылай-Талаа айылында туулган.
Ниязаалы атындагы Ош мамлекеттик музыкалык окуу жайынын окутуучу, оркестр артисти багытында жана Кыргыз-Өзбек университетинин экономика багытында билим алган.
Алишер Тоотаев Р. Абдыкадыров атындагы Ош облустук филармонияда солист, «Долбоор» акционердик коомунда музыкант, «ЭлТР» телеканалында редактор болуп эмгектенген. 2018-жылдан баштап «Жигиттер» фольклордук-эстрада тобун жетектеп келген.
«Маданияттын мыкты кызматкери» төш белгисинин жана башка бир катар сыйлыктардын ээси.
Эскерте кетсек, буга чейин Ош облустук филармониясын Гүлшайыр Садыбакасова жетектеп келген.
Биздин Телеграм каналга катталыңыз
