2-августта Ысык-Көлдүн жээгинде UIM Formula 1 H2O Grand Prix of Kyrgyzstan — Issyk-Kul 2026 мелдешинин жыйынтыктоочу күнү өттү.

Программага Formula 1 H2O суу-мотордук спорту боюнча дүйнө чемпионатынын кыргызстандык этабынын негизги жарышы, жеңүүчүлөрдү сыйлоо аземи, эл аралык фестивалдын расмий жабылышы жана ата мекендик, ошондой эле чет элдик аткаруучулардын катышуусундагы гала-концерт кирди.

Финалдык күн Кыргызстанда биринчи жолу өткөн ири эл аралык спорттук-маданий иш-чаранын туу чокусу болду. Үч күндүн ичинде Ысык-Көл Formula 1 H2O’нун эң мыкты пилотторун, эл аралык командаларды, расмий делегацияларды, дүйнөлүк ММК өкүлдөрүн жана миңдеген көрүүчүлөрдү кабыл алды.

Акваторияны даярдоо жана катышуучуларды тааныштыруудан кийин пилоттордун салтанаттуу парады болуп, андан соң дүйнөнүн мыкты жарышчылары дүйнө чемпионатынын этабынын башкы жарышынын стартына чыгышты.

Мелдеш учурунда көрүүчүлөр чоң LED-экрандардан тайминг, статистика жана графикага көз салып, ошондой эле суудагы күрөштүн жүрүшү тууралуу кесипкөй комментарийлерди уга алышты.

Финалдык жарыштын жыйынтыгында Victory Team командасынын пилоту Шон Торренте (Shaun Torrente) Кыргызстандын Гран-присинин жеңүүчүсү болду. Экинчи орунду Эрик Старк, ал эми үчүнчү орунду Алекс Векстром ээледи.

Финалдык жарышка 18 спортчу катышып, алар Ысык-Көлдүн акваториясында жогорку ылдамдыкты жана ылдам жүрүүчү болиддерди башкаруу чеберчилигин көрсөтүү менен күч сынашты.

Сыйлоо аземи мелдеш аяктагандан кийин дароо өттү. Гран-принин жеңүүчүсүнө сыйлыкты Министрлер кабинетинин башчысы Адылбек Касымалиев тапшырды. Экинчи орун үчүн байгени Эрик Старкка Министрлер кабинетине караштуу Туризмди өнүктүрүү боюнча мамлекеттик агенттиктин директору Эдуард Кубатов берди. Үчүнчү орундун кубогун Алекс Векстромго КР Суу-мотордук спорту федерациясынын президенти Айбек Абылкасымов тапшырды.