Ысык-Көл облусунда катуу жааган жамгырдан кийин айрым аймактарда сел жүрдү. Өзгөчө кырдаалдар министрлигинин маалыматына ылайык, селдин кесепетинен Балыкчы — Бөкөнбаев — Каракол унаа жолу Кажы-Сай аймагында убактылуу жабылды.
Суу жолдогу бетон шакекчелерди жууп кеткен жана жакын жайгашкан турак үйлөрдү каптаган.

Көлдүн түндүк жээк тарабындагы Тамчы айылында сел ички жолдордогу эки көпүрөнү алып кеткен. Ошондой эле эки турак үйдүн короосун суу каптады.

Кош-Көл айылында да суу ташкыны чоң зыян келтирди: көл жээгине тигилген 30 боз үй, 5 конок үй жана бир нече соода күркөлөрүн сел каптады.

Учурда жабыркаган аймактарда тазалоо жана калыбына келтирүү иштери жүрүп жатат.