Ысык-Көл районунда куткаруучулар үчүн атайын уюштурулган «Асыл-Таш» эс алуу жайы салтанаттуу түрдө ачылды. Бул тууралуу Өзгөчө кырдаалдар министрлиги билдирди.

«Буга чейин түйшүктүү кесипти аркалаган куткаруучуларды эс алдырууда шарттар жетишсиз болсо, эми бул маселе чечилди. «Асыл-Таш» пансионаты эми куткаруучулар үчүн кызмат кылат», — деди ӨКМ министри.

Анын айтымында, бул демилге президент Садыр Жапаров менен УКМК төрагасы Камчыбек Ташиевдин саясатынын негизинде ишке ашты. Буга чейин мыйзамсыз менчиктештирилип кеткен бул объект мамлекетке кайтарылып, элдин кызыкчылыгына пайдаланылууда.

Пансионат Өзгөчө кырдаалдар министрлигинин карамагына өткөндөн кийин толук оңдоп-түзөөдөн өткөрүлүп, куткаруучуларга ыңгайлуу шарттар түзүлгөн.