Бишкек шаарынын тургундары муниципалдык коомдук транспорттогу жаңы которулуп түшүү тарифин активдүү колдонуп жатышат. Ал ишке кирген алгачкы алты күндүн ичинде жүргүнчүлөр 56 817 жолу акысыз которулуп түшүшкөн.

Жаңы система биринчи жолку жол кирени накталай эмес төлөгөн жүргүнчүлөргө 60 мүнөттүн ичинде башка муниципалдык каттамдарга акысыз которулуп түшүүгө мүмкүнчүлүк берет.

Мэриянын маалыматына караганда, жаңы тарифке болгон жогорку суроо-талап анын шаар тургундары үчүн пайдалуу экенин көрсөтүүдө. Бул система шаар ичинде жүрүүнү ыңгайлуу кылып, жүргүнчүлөрдүн жол киреге кеткен чыгымдарын азайтып, коомдук транспорттун ишинин натыйжалуулугун жогорулатууга жардам берет.

Ошондой эле мэриянын басма сөз кызматы билдиргендей, «Бишкек шаардык транспорт» муниципалдык ишканасы жол кирени төлөө эрежелеринин сакталышын көзөмөлдөө боюнча күн сайын, анын ичинде дем алыш күндөрү да рейддерди өткөрүүдө. Жүргүнчүлөргө жана айдоочуларга түшүндүрүү иштери жүргүзүлүп, көзөмөл туруктуу негизде улантылат.