УКМК «КУЭТ» ААКсынын Чүй электр тармактар ишканасында коррупциялык схема аныкталганын билдирди. Атайын кызматтын маалыматы боюнча, эсептөө приборлорун кыйгап өтүү менен улуттук электр тармактарына кошуу үчүн мыйзамсыз акча жыйноолор жүргүзүлүп келген.

Өзгөчө ири өлчөмдө пара алуу беренеси боюнча козголгон кылмыш ишинин алкагында 6-июлда Чүй электр тармактар ишканасынын Панфилов РЭТтин (райондук электр тармагы) башчысы кармалды. Ал УКМКнын убактылуу кармоочу жайына киргизилди.

Тергөөнүн версиясы боюнча, кызмат адамы керектөөчүлөрдү электр тармактарына мыйзамсыз туташтыруу үчүн системалуу түрдө акча каражаттарын алып турган.

Учурда тергөө иш-аракеттери уланууда. УКМК окуянын бардык жагдайлары, ошондой эле бул коррупциялык схемага катыштыгы болушу мүмкүн болгон башка адамдар аныкталып жатканын билдирди.