Президент Садыр Жапаров Баткен облусуна болгон жумушчу сапарынын алкагында Кадамжай районунун социалдык-экономикалык көрсөткүчтөрү жана Кадамжай менен Кызыл-Кыя шаарларын өнүктүрүү долбоорлору менен таанышты. Бул тууралуу мамлекет башчысынын басма сөз кызматы билдирет.

Сунушталган демилгелердин арасында баасы 30 миллиард сомду түзгөн жаңы кичи райондун жана 3 миллиард сомдук транспорттук-логистикалык комплекстин курулушу бар.

Экономика

Кадамжай районунун акими Болоткан Белек уулу өнөр жай өндүрүшүнүн көлөмү 2021-жылдагы 994,9 млн сомдон 2026-жылдын тогуз айында 2,5 млрд сомго чейин өскөнүн билдирди. Жылдын жыйынтыгы боюнча бул көрсөткүчтү 3 миллиард сомго жеткирүү пландалууда.

Үстүбүздөгү жылдын тогуз айында тартылган инвестициянын көлөмү 2,8 млрд сомго жетти. Салыштыруу үчүн, 2021-жылдын жыйынтыгы боюнча ал 1,77 млрд сомду түзгөн. 2026-жылдын аягына чейин 4 миллиард сом инвестиция тартуу мерчемделүүдө.

Тогуз айдагы салыктык түшүүлөр 735,8 млн сомду түздү (бүтүндөй 2021-жылы 340,8 млн сом болгон). Болжолдоолор боюнча, жыл аягына чейин бул көрсөткүч 1 миллиард сомдон ашат.

Райондо билим берүү, саламаттыкты сактоо жана спорт тармактарында 91 объект пайдаланууга берилди. Ошондой эле 13 өнөр жай ишканасы ачылып, 138 жумуш орду түзүлдү.

Жаңы өндүрүш объектилеринин катарында — эки чакан ГЭС, асфальт заводу, төрт таш майдалоочу цех, бетон, пеноблок жана газоблок чыгаруучу ишканалар, ошондой эле тигүү цехи бар.

21 айылда калкты таза ичүүчү суу менен камсыз кылуу иштери уланууда. Долбоорлордун жалпы баасы 574,3 млн сомду түзөт.

Мындан тышкары, Кадамжайда 2011-жылдагы жер титирөөдөн кийин авариялык абалда деп табылган жети имараттын ордуна жаңы көп батирлүү үйлөрдүн курулушу башталды.

Кадамжайдын өнүгүшү

Кадамжай шаарынын мэри Бакытбек Кошалиев шаардагы өнөр жай өндүрүшүнүн көлөмү 2021-жылдагы 565 млн сомдон 2025-жылы 1,97 млрд сомго чейин өскөнүн билдирди.

2026-жылдын тогуз айында бул көрсөткүч 1,58 млрд сомго жетип, өткөн жылдын ушул мезгилине салыштырмалуу 368,8 млн сомго көбөйгөн.

Тогуз ай ичиндеги инвестициянын көлөмү 925,1 млн сомду түздү, бул 2025-жылдын тийиштүү мезгилине караганда 199 млн сомго көп.

Жаңы кичи район жана логистикалык комплекс

Мамлекеттик-жеке өнөктөштүктүн алкагында эки ири инвестициялык долбоорду ишке ашыруу пландалууда.

Биринчиси — 13 гектар аянтта транспорттук-логистикалык комплекстин курулушу. Долбоордун баасы 3 млрд сом деп бааланууда. Аны ишке ашыруу менен 5 миң жумуш орду түзүлөт деп күтүлүүдө.

Экинчи долбоор — Кызыл-Кыя шаарындагы 71 гектар аянтка жаңы кичи райондун курулушу. Анын болжолдуу баасы 30 млрд сомду түзөт.

Эки долбоордун тең ишке ашырылуу мөөнөттөрү азырынча тактала элек.

Презентациянын жыйынтыгында Садыр Жапаров пландаштырылган демилгелерди натыйжалуу ишке ашыруунун жана аймактын экономикалык потенциалын мындан ары да өнүктүрүүнүн зарылдыгын баса белгиледи.