Жогорку Кеңештин конституциялык мыйзамдар, мамлекеттик түзүлүш, жергиликтүү өз алдынча башкаруу жана регламент боюнча комитети «Айрым мыйзам актыларына өзгөртүүлөрдү киргизүү жөнүндө» мыйзам долбоорун карап чыгып, үч окууда тең колдоду.

Документ «Борбор калаанын статусу жөнүндө», «Ош шаарынын статусу жөнүндө», ошондой эле «Жергиликтүү мамлекеттик администрация жана жергиликтүү өз алдынча башкаруу органдары жөнүндө» мыйзамдарга өзгөртүүлөрдү киргизүүнү карайт.

Мыйзам долбоорунун негизги максаты — жергиликтүү бийлик органдарынын ишинин ачык-айкындуулугун камсыз кылуу, ошондой эле жергиликтүү мамлекеттик администрациялардын башчыларынын (акимдердин) жана шаарлардын мэрлеринин калк алдындагы жоопкерчилигин жогорулатуу.

Сунушталып жаткан өзгөртүүлөргө ылайык, акимдер жана мэрлер жылына эки жолу — февраль–март жана ноябрь–декабрь айларында — калк менен милдеттүү түрдө жолугушууларды өткөрүүгө тийиш. Бул жолугушуулар жергиликтүү коомчулук менен түз диалог жүргүзүүнүн негизги куралы болот деп күтүлүүдө.

Мыйзам долбоору Кыргыз Республикасынын Президентинин 2026-жылдын 10–15-апрелинде Ош облусуна жана Ош шаарына болгон иш сапарынын жыйынтыгы боюнча берген тапшырмасын аткаруу максатында иштелип чыккан.