Жогорку Кеңештин Өнөр жай саясаты, транспорт, отун-энергетикалык комплекс, архитектура жана курулуш боюнча комитети мамлекеттик жана муниципалдык жерлерди инвесторлорго берүү тартибин өзгөртүүнү караган мыйзам долбоорун биринчи окууда жактырды.

Негизги өзгөртүүлөрдүн бири жерди пайдалануу мөөнөтүнө байланыштуу. Министрлер кабинети менен түзүлгөн инвестициялык макулдашуунун негизинде ишке ашырылуучу долбоорлор үчүн жер тилкесин алгач 10 жылга берүү сунушталууда. Эгер инвестор өз милдеттенмелерин толук жана өз убагында аткарса, мөөнөт 25 жылга чейин, андан кийин жалпы эсеп менен 50 жылга чейин узартылышы мүмкүн.

Улуттук инвестициялык долбоорлор жана мамлекеттик маанидеги долбоорлор үчүн мамлекеттик жана муниципалдык жер тилкелерин Министрлер кабинетинин чечими менен 50 жылга чейин убактылуу пайдаланууга берүү сунушталууда. Жер максаттуу багыты боюнча пайдаланылышы керек.

Ошол эле учурда мыйзам долбоору чет өлкөлүктөргө жер сатууга уруксат бербейт. Жерди чет өлкөлүк жактардын менчигине берүүгө карата азыркы тыюу сакталат. Мыйзам долбоору Жер кодексинин бул маселени жөнгө салган 8-беренесине өзгөртүү киргизбейт. Чет өлкөлүктөр мурдагыдай эле мыйзамда каралган учурларда жер тилкелерин убактылуу пайдаланууга ала алышат.

Ошондой эле улуттук же мамлекеттик маанидеги инвестициялык долбоор боюнча инвестор өз милдеттенмелерин аткарбаса же долбоор тиешелүү тизмеден чыгарылса, жер тилкесин мамлекетке кайтарып берүү каралган.

Дагы бир өзгөртүү мамлекеттик жер тилкелерин мамлекеттин чарбалык коомдун уставдык капиталына кошкон салымы катары анын менчигине өткөрүп берүүгө мүмкүнчүлүк берет. Бирок мындай компаниянын уставдык капиталынын кеминде 50 пайызы мамлекетке таандык болушу керек. Бул механизмди мамлекеттик программаларды жана милдеттерди ишке ашырууда, ошондой эле стратегиялык объектилерди курууда колдонуу сунушталууда.