Грек-рим күрөшү боюнча балбан Жоламан Шаршенбеков (60 кг) Кытайда өтүп жаткан Азия оюндарынын жеңүүчүсү болду.
Күрөш боюнча мелдештер бүгүн, 4-октябрда башталып, Шаршенбековдун биринчи беттеши 1/8 финалда болуп өттү.
Анын алгачкы атаандашы тажикстандык Асламжон Азизов болду. Беттештин биринчи бөлүгүндө тажикстандык балбан 5 упай алып, алдыга чыккан. Бирок экинчи бөлүктө Жоламан Шаршенбеов жалпы 8 упай алууга жетишип, жеңишти сууруп кетти.
Чейрек финалда Шаршенбеков түштүк кореялык Ханжаэ Чунду 9:0, андан кийин жарым финалда өзбекстандык Исломжон Бахрамовду 11:0 эсебинде жеңди.
Финалда Шаршенбеков япониялык Аята Сузуки менен беттешип, биринчи бөлүктүн аягында анын далысын килемге басып, таза жеңишке жетти.
Шаршенбеков биринчи ирет Азия оюндарынын жеңүүчүсү болду.
Биздин Телеграм каналга катталыңыз
