Журналист Арзыгүл Галымбетованын өлүмүнө байланыштуу блогер кармалды. Факт боюнча “Байкабастыктан адам өлүмүнө алып келүү” беренеси боюнча иш козголду. Бул тууралуу Баткен облустук ички иштер башкармалыгынын басма сөз кызматы билдирди.

Мекемеден билдиргендей, Арзыгүл каза болгон күнү Баткен шаардык ички иштер бөлүмүнө кайрылып, «Батма-Бат» YouTube каналынын колдонуучусу социалдык тармактарда аны жамандап, «ар-намысына шек келтирип жатканын» билдирген. Милицияга кайрылгандан бир нече сааттан кийин Арзыгүл ооруп калган. Ошол эле күнү кечинде журналист каза болгон.

33 жаштагы блогер Батма Жолдубаева убактылуу кармоочу жайга камалды.