Афганистандын чыгышында күчү 6 баллга жеткен жер титирөөнүн кесепетинен 800дөн ашуун адам каза болуп, 2800дөй киши жаракат алды.

Буга чейин 600дөн ашуун адамдын каза болгону жана 1500дөн ашуун адамдын жаракат алганы маалымдалган. Өлкөнүн Саламаттыкты сактоо министрлиги курмандыктардын саны дагы көбөйүшү мүмкүн экенин эскертти.

Зилзаланын очогу Кунар провинциясында жайгашып, бул аймак олуттуу зыян тартты. Бирок каза болгондор жана жабыркагандар боюнча так маалымат азырынча жок. Анткени айрым райондорго жол жеткиликсиз болуп, уюлдук байланыш үзгүлтүккө учураган.