Президентке караштуу Виртуалдык активдер жана блокчейн-технологиялар боюнча улуттук агенттик виртуалдык активдер чөйрөсүндө текшерүү, лицензиялоо жана көзөмөл жүргүзүү үчүн бирдиктүү санариптик платформаны ишке киргизүүгө даярданып жатат. Бул тууралуу агенттик билдирди.

Платформа арыз ээлерин текшерип, блокчейн-аналитиканы колдонот. Атап айтканда, компаниялар, алардын жетекчилери жана акыркы бенефициардык ээлери тууралуу маалыматтарды, анын ичинде санкциялык тизмелер боюнча текшерүү пландалууда. Агенттиктин пикиринде, бул тобокелдиктерди аныктоого жана арыздарды кароодо аларды эске алууга жардам берет. Ошондой эле платформа мамлекеттик органдардын өз ара иштешүүсүн жакшыртып, рынокту жөнгө салуунун натыйжалуулугун жогорулатууга тийиш.

Платформаны түзүү идеясын Виртуалдык активдерди жана блокчейн-технологияларды өнүктүрүү боюнча улуттук кеңеш колдогон. Бул маселе 2026-жылдын сентябрында президент төрагалык кылган кеңештин үчүнчү жыйынында каралып чыккан. Жыйындын жыйынтыгында ченемдик укуктук базаны өркүндөтүү, коопсуздук жана тобокелдиктерди башкаруу боюнча бирдиктүү ыкмаларды иштеп чыгуу, ошондой эле санкциялык тобокелдиктерди мындан ары азайтуу боюнча милдеттер аныкталган.

Агенттик рыноктун катышуучуларына коюлган талаптарды өркүндөтүү, эл аралык стандарттарды киргизүү жана текшерүү менен тобокелдиктерди баалоо механизмдерин өнүктүрүү боюнча иштер уланып жатканын кошумчалады.