АКШ Перси булуңундагы мамлекеттерден аларды коргоого кеткен чыгымдардын ордун толтуруп берүүнү талап кылууну көздөөдө, деп билдирди АКШ президенти Дональд Трамп.

«Мен чыгымдардын ордун толтуруп берүүлөрүн каалайм, анткени биз дүйнөнүн абдан бай бөлүгүн коргоп жатабыз. Биз акча коротуп жатабыз, ошондуктан коргоо үчүн кеткен чыгымдарды бизге төлөп бере тургандай шарт түздүк. Биз жардам берип жаткан өлкөлөр коргогонубуз үчүн бизге акы төлөшөт. Мисалы, ушул беш өлкөнү карагылачы: Сауд Арабиясы, БАЭ (Бириккен Араб Эмираттары), Катар, баса, башкалары да бар», — деди Трамп Овал кабинетинде журналисттер менен баарлашуу учурунда.

Буга чейин Перси булуңундагы өлкөлөрдүн өкүлдөрү Иранга сокку урууну кийинкиге калтырууну суранышкандыгы тууралуу президент Трамптын сөздөрүн төгүндөшкөн.

Эскерте кетсек, 14-июнда Трамп Иранда согуштук аракеттер кайра жанданары тууралуу Конгресске расмий түрдө маалымдаган. Ошондой эле ал жакында эле АКШ Ормуз кысыгынын коопсуздугун камсыз кылууну жана ал үчүн акы алууну көздөп жатканын билдирген болчу.

Буга жооп катары Ирандын «Хатам аль-Анбия» аскердик командачылыгынын Борбордук штабы Тегеран Вашингтонго Ормуз кысыгын башкаруу маселелерине кийлигишүүсүнө жол бербей турганын билдирди.

8-июлда АКШ аскерлери Иранга бир нече ирет чабуул жасашкан. АКШнын Куралдуу күчтөрүнүн Борбордук командачылыгы муну Ирандын Ормуз кысыгы аркылуу өтүп бара жаткан коммерциялык кемелерге каршы аракеттерине жооп катары жасалды деп ырастаган. Ирандын аскерлери буга жооп катары Кувейт, Бахрейн жана Иорданиядагы АКШнын аскер базаларына сокку урушкан.