«Ала-Арча» мамлекеттик жаратылыш паркында асма жолдун курулуш иштери аяктады. Бул тууралуу Президенттин иш башкармалыгы маалымдады. Объектинин капсуласы бир жыл мурун салынган.

Асма жолдун узундугу бир чакырымды түзөт. Ал жалпы 16 кабина менен жабдылган. Анын ичинен 14 кабина 10 кишиге ылайыкталган, ал эми эки кабина төрт орундуу VIP-категориясына кирет. Курулуш иштерин австриялык Doppelmayr компаниясы ишке ашырды.

Учурда объектилерде техникалык текшерүүлөр жүргүзүлүүдө. Бул долбоордун биринчи этабы болуп саналат. Кийинки этапта 23 чакырымдык асма жол жана родельбан куруу пландалууда.