Жалал-Абаддын Ала-Бука районунда тургун алтын издеп жайыт жердин кунарлуу катмарын бузган. Бул тууралуу Айыл чарба министрлиги билдирди.

Маалым болгондой, Ала-Буканын Сарча тилкесинде А.Н. аттуу жаранга акимчилик тарабынан чачыранды алтын казып алууга күбөлүк берилген. Күбөлүк 0,5 гектар жерди иштетүүгө берилгени менен тургун андан тышкары 0,34 гектар жерди казып салып, жайыт жердин кунарлуу катмарын бузган.

Натыйжада жер катмарын бузганы үчүн ага 261 миң 120 сом доо коюлуп, Укук бузуулар кодексинин 241-беренесине (Күрдүү кыртыштын катмарын алуу, сактоо жана жаткыруу шарттарын аткарбоо) ылайык 5,5 миң сом айып салынган.