Жогорку Кеңеште телефондук алдамчылык фактылары көбөйүп, шылуундар депутаттардын жана министрлер кабинетинин мүчөлөрүнүн сүрөттөрүн колдонуп, алардын атынан билдирүүлөрдү жөнөтүп жатышат. Бул тууралуу парламенттин жыйынында депутат Улукбек Ормонов билдирди.

Анын айтымында, мындай учурлар акыркы бир нече жумадан бери уланып, Жогорку Кеңештин депутаттарын да камтууда.

Депутаттын айтымында, алдамчылар мессенжерлерде жана социалдык тармактарда депутаттардын жана парламент жетекчилигинин сүрөттөрүн колдонуп, өздөрүн алар катары көрсөтүп жатышат.

«Бул көрүнүш эки-үч жумадан бери уланып жатат. Мындан тышкары, телефондук алдамчылардын курмандыгы болуп жаткан жарандар да көп. Менимче, аларды аныктоо анчалык деле кыйын эмес. Алар жазып жаткан телефон номерлери бар, ошол номерлер аркылуу алардын ким экенин жана кайсы жерде экенин аныктоого болот», — деди Ормонов.

Буга байланыштуу ал укук коргоо органдарын шылуундардын өздүгүн аныктоо боюнча чара көрүүгө чакырды.

«ИИМ, УКМК жана башка атайын органдар бул алдамчыларды таап чыгышы керек. Өзгөчө ИИМ бул багыттагы ишинин жыйынтыгын коомчулукка көрсөтүшү зарыл», — деди депутат.