АКШдагы сыноолор учурунда америкалык миллиардер жана Amazon компаниясынын негиздөөчүсү Джефф Безоско таандык Blue Origin компаниясынын New Glenn оор ракетасы жарылды. Окуя 28-майдын кечинде Флорида штатындагы Кейп-Канавералдагы учуруу аянтчасында болгон.

Компаниянын маалыматы боюнча, жарылуу hot-fire test учурунда болгон — бул ракетанын кыймылдаткычтарын жерден үзбөстөн, түз эле учуруу столунда от алдырып текшерген сыноо. Сыноо башталгандан кийин «аномалия» деп аталган көрүнүш катталган — ракета тармагында олуттуу аварияны же техникалык мүчүлүштүктү адатта ушул сөз менен белгилешет. Компания жабыркагандар жок экенин жана бардык кызматкерлер эвакуацияланганын билдирди.

Аянтчанын үстүндө чоң оттуу шар жана коюу түтүн көтөрүлгөн. Америкалык ЖМКлардын маалыматына караганда, сокку толкуну (жарылуунун күчү) жакын жайгашкан аймактарда да сезилген. Өзгөчө кырдаалдар кызматтары калкка жана айлана-чөйрөгө коркунуч жок экенин билдиришти.

Reporter.kg маалымдамасы: New Glenn — Blue Origin компаниясынын эң амбициялуу ракетасы. Ал SpaceX менен атаандашуу, спутниктерди орбитага чыгаруу жана NASA келишимдерине катышуу үчүн компаниянын башкы долбоору катары көп жылдардан бери иштелип келүүдө. Авариядан кийин Джефф Безос жарылуунун себептери тууралуу айтууга азырынча эрте экенин билдирди: алгач компания иликтөө жүргүзөт.

Авариядан кийин Безос жарылуунун себептери тууралуу айтууга эрте экенин билдирди. Анын айтымында, компанияны иликтөө күтүп жатат, андан соң бузулган инфратүзүмдү калыбына келтирүү жана мындан аркы сыноолор боюнча чечимдер кабыл алынат.

SpaceX компаниясынын жетекчиси Илон Маск жарылуунун кадрлары таралган соң:

«Ракеталар — бул татаал нерсе», — деп кыскача реакция кылды.