Кыргызстандын айыл чарба министринин орун басары Илич Марсбек уулу Чуваш Республикасынын айыл чарба министри Андрей Макушев менен онлайн форматта сүйлөшүүлөрдү жүргүздү. Жолугушуунун негизги темасы Кыргызстанга жогорку өндүрүмдүүлүктөгү асыл тукум малды — голштин-фриз тукумундагы кунажындарды жана бордоп семиртилүүчү букачарларды түз жеткирүү болду. Тараптар ошондой эле Чувашияда малды жөнөтүү үчүн атайын карантиндик-экспорттук базаны куруу мүмкүнчүлүгүн карап чыгышты.

Экинчи маанилүү багыт катары агрардык билим берүүнү өнүктүрүү белгиленди. Мекемелер Кыргыз улуттук агрардык университетинин базасында «Ветеринария», «Зоотехния» жана «Агрономия» багыттары боюнча кош диплом программаларын ишке киргизүүнү, ошондой эле студенттер менен окутуучулар үчүн үзгүлтүксүз такшалмаларды жана академиялык алмашууну уюштурууну талкуулашты.

Жолугушуунун жыйынтыгында тараптар селекция, ветеринардык көзөмөл жана квалификациялуу агрардык адистерди даярдоо тармагында өнөктөштүктү өнүктүрүүгө эки тараптуу даяр экендиктерин тастыкташты.