АКШнын Чикаго шаарында Кыргызстандан барган 29 жаштагы Дастан К.га оордотуучу жагдайларда сексуалдык зомбулук жасаган деген айып тагылды. Бул тууралуу CWB Chicago басылмасы жазды.

Тергөө версиясы боюнча, кылмыш 4-сентябрда Аптаун районунда жайгашкан VIP Therapy Body Work массаж салонунда болгон.

Баш коргоо чарасын тандоо боюнча сот отурумунда белгилүү болгондой, ал Кыргызстанда дарыгер болуп иштеген. АКШга көчүп баргандан кийин ал америкалык медициналык лицензия алууга аракет кылып, Чикагодогу ооруканалардын биринде практикадан өтүп жүргөн.

Штаттын прокурорунун жардамчысы Карен Кротерстин айтымында, жабырлануучу аял массажга мобилдик тиркеме аркылуу жазылган. Ал салонго келгенде, аны кызматкер аял тосуп алып, процедураны адегенде өзү баштап, кийин башка адис улантарын түшүндүргөн.

Бирок кызматкер аял массаж жасоого киришкен эмес. Бир нече мүнөттөн кийин бөлмөгө тергөөчүлөр кийинчерээк «К.» деп аныктаган эркек киши кирген.

Ал учурда кардар кийимин чечип, массаж үстөлүнө көмкөрөсүнөн жатып, үстүн сүлгү менен жаап алган.

Прокурордун айтымында, алгач процедура кадимкидей өткөн, бирок болжол менен 45 мүнөттөн кийин массажисттин жүрүм-туруму өзгөргөн.

Айыптоо тараптын маалыматына караганда, эркек аялдын белин катуу сүртө баштап, буттарын жана томуктарын күч менен кыймылдатып, андан соң колун буту менен өйдө жылдырып, сандын ички тарабына жеткирген.

Андан кийин, прокуратуранын версиясы боюнча, ал аялды жаап турган шейшепти жылдырып, массаж үстөлүнө чыгып, сексуалдык зомбулук жасаган.

«Жабырлануучу массаж үстөлүндө таптакыр кыймылдай албай катып калган. Ал коркуп, кандайдыр бир кыймыл зомбулукту ого бетер күчөтүп жиберет деп чочулагандыктан ордунан козголгон эмес», — деди Кротерс сотто.

Прокуратуранын маалыматына ылайык, окуядан кийин аял чечинүүчү бөлмөдө отуруп, эки досуна жана психотерапевтине байланышкан.

Досторунун биринин кеңеши менен ал Rush Hospital ооруканасына барып, медициналык жардам алган. Ошондой эле болжолдуу сексуалдык зомбулук боюнча далилдерди чогултуу үчүн соттук-медициналык текшерүүдөн өткөн.

Кротерстин айтымында, текшерүү учурунда аялдын денесинде бир катар жаракаттар, анын ичинде кызаруу, тийгенде оорутуу жана сандын ички тарабында, жамбашында жана колунда көгөргөн тактар аныкталган.

Медициналык кызматкерлер ооруканага полиция чакырып, андан кийин тергөө иштери башталган.

Тергөөчүлөр массаж салонунун ээсинен сурак алып, ал кызматкерлердин иш графигин берген. Жазууларга ылайык, жабырлануучуга Дэн аттуу адам массаж жасамак. Аял буга чейин полицияга дал ушул ысымды айткан.

Салондун ээси тергөөчүлөргө кызматкердин айдоочулук күбөлүгүнүн көчүрмөсүн да берген. Прокуратуранын маалыматына караганда, документ Дастан К.га таандык болгон.

16-сентябрда полиция кызматкерлери массаж салонунун жанынан эркек кишини жолуктуруп, андан массаж кызматтарын көрсөтүүгө лицензиясы бар-жогун сурашкан.

Прокурордун айтымында, ал лицензиясы жок экенин билдирген. Ошол эле учурда салондо иштегенин жана массаж жасаганын четке каккан.

Кийинчерээк Кыргызстандан барган жаран кармалып, ага оордотуучу жагдайларда сексуалдык зомбулук жасаган деген айып тагылган. Прокуратуранын маалыматы боюнча, VIP Therapy Body Work массаж салону тиешелүү лицензиясы жок иштегендиктен, шаар бийлиги тарабынан жабылган.

Сот отурумунда айыпталуучунун адвокаты Кэролин Пол анын кардары медициналык билим алып, Кыргызстанда дарыгер болуп иштегенин билдирген.

Чикагого көчүп баргандан кийин ал АКШда медициналык карьерасын улантууга жана бул үчүн зарыл болгон лицензияны алууга аракет кылган.

Коргоочунун айтымында, март айынан бери Кудаяров жергиликтүү ооруканалардын биринде ыктыярчы болуп иштеген. Ал жерде америкалык дарыгерлердин ишин байкап, аларга жардам берип, кесиптик тажрыйба топтогон.

Ошол эле учурда адвокат эркек киши бейтаптарды өз алдынча дарылабаганын жана аларга түздөн-түз медициналык жардам көрсөтпөгөнүн баса белгилеген.

Пол ошондой эле Кыргызстандын жараны буга чейин АКШда кылмыш жоопкерчилигине тартылбаганын билдирген. Анын айтымында, айыпталуучунун жубайы, аны менен медициналык окуу жайда чогуу окуган аял, учурда кош бойлуулуктун 17-жумасында. Жубайлар биринчи баласын күтүп жатышат.

Адвокат кылмыш иши анын кардарынын келечектеги кесиптик пландарына таасир этиши мүмкүн экенин моюнга алган.

«Ошого карабастан, бул иш каралып жаткан учурда ординатурага тапшыруу аракетин кийинкиге жылдырууга туура келет деп ишенем», — деди Пол.

Айыптоо жана коргоо тараптын жүйөлөрүн карап чыккан судья Д’Энтони Тедфорд шектүүнү камакта калтыруу чечимин чыгарган. Судья маанилүү жагдайлардын бири катары эркек кишинин массаж салонунун жанында полиция менен алгачкы сүйлөшүү учурундагы жүрүм-турумун атаган.

Тактап айтканда, Тедфорд айыпталуучу салондун ишине тиешеси бар экенин четке какканына көңүл бурган. Судьянын пикиринде, мындай билдирүүлөр анын күнөөсүн түшүнгөнүн көрсөтүшү мүмкүн.

Анын медициналык ишмердиги да өзүнчө тынчсыздануу жараткан. Судья коргоо тарабы анын бейтаптар менен түздөн-түз байланышта болбогонун билдиргенине карабастан, эркек киши медициналык кызматкерлер адамдар менен иштешкен ооруканада практикадан өтүп жүргөнүн белгилеген.

«Мен коргоо тарабынын ал сырттан гана байкап, адамдар менен байланышпайт деген жүйөсүн түшүнөм. Бирок ал ооруканада дарыгер болуп жүрөт. Ал эми ооруканалардагы дарыгерлер бейтаптарга медициналык жардам көрсөтүшөт», — деди Тедфорд.

Анын айтымында, сот айланасындагы адамдардын коопсуздугун камсыздай турган башка бөгөт коюу чарасын аныктай алган эмес.

«Мен бул жагдайларды өзгөчө оор деп эсептейм. Айыпталуучунун жабырлануучу менен кандайча байланыш түзгөнү да өзгөчө мүнөзгө ээ», — деп баса белгиледи судья.

Натыйжада Кыргызстандын жараны иш боюнча кийинки соттук териштирүү аяктаганга чейин камакта калтырылды.

Ошол эле учурда айып тагылышы адамдын күнөөлүү деп табылганын билдирбейт. Иш боюнча акыркы чечимди сот кабыл алат.

Кыргызстандын Тышкы иштер министрлиги Reporter.kg басылмасына кырдаалдан кабардар экенин жана АКШнын компетенттүү органдары менен тиешелүү иштерди жүргүзүп жатканын билдирди.