Бишкек шаарындагы балдардын тез жардам клиникалык ооруканасында (мурдагы 3-балдар ооруканасы) жети жашар бала каза тапты. Аны ата-энеси дарыгерлердин көзөмөлү жок, өз алдынча дарылаганы айтылды. Маалыматты оорукананын башкы дарыгери Акылбек Маманов «Клоопко» тастыктады.
Маманов баланы ооруканага 3-декабрь күнү оор абалда алып келишкенин белгиледи.
«Биз баланын өмүрүн сактап калууга бүт аракетибизди жумшадык, келери менен жандандыруу бөлүмүнө жаткырдык. Бирок ден соолугу начарлап 5-декабрда каза болду», — деп билдирди башкы дарыгер.
Баланы алгач Нарын облусунда медиктер текшерип, дартын аныкташкан. Бирок белгисиз себептерден улам баланын ата-энеси дарыгерлер менен кеңешпестен, өз алдынча дарылап баштаган.
Дарыгерлер баланын өлүмү тууралуу укук коргоо органдарына билдирген. Учурда териштирүү иштери жүрүүдө.
