Жогорку Кеңештин депутаты Салтанат Аманова көп батирлүү үйлөрдү башкаруунун совет мезгилиндеги тажрыйбасын эске алып, райондук дом башкармалыктарын түзүү мүмкүнчүлүгүн карап чыгууну сунуштады.

Ал бул демилгени Жогорку Кеңештин жыйынында көтөрүп, учурдагы турак жай менчик ээлеринин шериктештиги (ТСЖ) системасы тургундардын көйгөйлөрүн ар дайым эле натыйжалуу чече албай жатканын белгиледи.

Депутаттын айтымында, бүгүнкү күндө ТСЖлар 10–15 батирден турган чакан көп кабаттуу үйлөрдө дагы түзүлүп, бул айрым учурларда тургундардын ортосунда пикир келишпестиктерге жана уюштуруучулук кыйынчылыктарга алып келүүдө.

Аманова бир нече үйдү камтыган райондук деңгээлдеги бирдиктүү дом башкармалыгын түзүү кыйла натыйжалуу чечим болмок деп эсептейт.

«Мурда дом башкармалыктары үйлөрдүн абалын көзөмөлдөп, тазалык, коммуналдык тейлөө, тартип маселелерин карап, тургундардын күнүмдүк көйгөйлөрүн чечүүгө көмөктөшчү. Азыр эл менен жолугушууларда канализация, суу менен камсыздоо, көрктөндүрүү жана башка көптөгөн чечилбей жаткан маселелер көтөрүлүүдө», — деди депутат.

Анын пикиринде, райондук дом башкармалыктары ушул сыяктуу маселелерди чечүүнү өзүнө алып, алардын кызматкерлерине муниципалитет тарабынан эмгек акы төлөнүшү мүмкүн.

Буга байланыштуу парламентарий тиешелүү мамлекеттик органдарды мындай түзүмдөрдү мыйзамдын алкагында түзүү мүмкүнчүлүгүн карап чыгууга чакырды.