Кыргызстан тарыхта биринчи жолу БУУнун Коопсуздук Кеңешинин туруктуу эмес мүчөсү болду. Өлкө уюмдун негизги органдарынын биринин курамында 2027–2028-жылдары иш алып барат.

Кыргызстан биринчи жолу БУУнун Коопсуздук Кеңешинин туруктуу эмес мүчөсү болуп шайланды. Добуш берүү БУУнун Башкы Ассамблеясынын Нью-Йорк шаарындагы жыйынында өттү.

Кыргызстандын талапкерлигин 142 мамлекет колдоду, ал эми Филиппинге 49 өлкө добуш берди. Республика Азия-Тынч океан тобунун атынан катышты. Шайлануу үчүн талапкер добуш берүүгө катышкан БУУга мүчө мамлекеттердин кеминде үчтөн экисинин колдоосуна ээ болушу керек болчу. Бул учурда кеминде 129 добуш талап кылынган. Добуш берүү төрт раундда өттү.

Кыргызстан БУУнун Коопсуздук Кеңешинде 2027-жылдын 1-январынан 2028-жылдын 31-декабрына чейин иш алып барат. Буга чейин өлкө эч качан Коопсуздук Кеңешинин курамына кирген эмес. Кеңешке жалпысынан 15 мамлекет кирет: бешөө туруктуу мүчө, ону эки жылга шайлануучу туруктуу эмес мүчө.

Президент Садыр Жапаров жыйынтыктар жарыялангандан кийин кыргызстандыктарды куттуктады. «Биз БУУнун тарыхындагы жаңы баракты жазууга катышабыз. Куттуктайм, мекендештер!» — деп жазды мамлекет башчысы.

Буга чейин тышкы иштер министри Жээнбек Кулубаев Кыргызстан шайланган учурда туруктуу тынчтык, алдын алуучу дипломатия, калктын аялуу катмарларын коргоо, климаттык коопсуздук жана мамлекеттер ортосундагы ишенимди бекемдөө күн тартибин илгерилетүүгө ниеттенерин билдирген. Өлкө Коопсуздук Кеңешинде адилеттүү жана инклюзивдүү өкүлчүлүк маселелерине да өзгөчө көңүл бурууну пландап жатат.

Мурдагы тышкы иштер министри Аликбек Жекшенкулов Кыргызстандын шайланышын ата мекендик дипломатиянын чоң жетишкендиги деп атады. Анын айтымында, бул геосаясий туруксуздуктун татаал мезгилинде өлкөнүн эл аралык аренадагы ролун кыйла жогорулатат. Ал ошондой эле эми Кыргызстанга, анын ичинде Борбор Азия үчүн да, чоң жоопкерчилик жүктөлөрүн белгиледи.