Башкы прокурор Курманкул Зулушев өз милдетин аткарууга киришти. Бул тууралуу  президенттин басма сөз кызматы билдирди.

Маалыматка караганда, тиешелүү тескемеге Кыргызстандын президенти Садыр Жапаров кол койгон.

“Кыргыз Республикасынын Конституциясынын 66, 71-беренелеринин негизинде башкы прокурор Зулушев Курманкул Токторалыевич үстүбүздөгү жылдын 16-июнунан тарта өзүнүн кызматтык милдетин аткарууга киришти”, – деп айтылат билдирүүдө.

Ошондой эле, аталган тескеме менен мамлекет башчысынын 2022-жылдын 3-июнундагы тескемесинин 2-пункту күчүн жоготту деп табылды.

Буга чейин башкы прокурор Курманкул Зулушев саламаттык сактоо министри Алымкадыр Бейшеналиевге козголгон кылмыш иштин алкагында ал ээлеген кызматынан убактылуу четтетилген болчу.