Финансы министрлигине караштуу Мамлекеттик бажы кызматынын кызматкери Алмаз Эргешов сумо боюнча өлкө чемпиону болду. Бул тууралуу Бажы кызматынан билдиришти.
Маалыматка караганда, сумо күрөшү боюнча чемпионаты 11-августта Бишкекте Кыргыз мамлекеттик дене тарбия жана спорт академиясынын аянтында өттү. Мелдешке өлкөнүн бардык аймактарынан ар кандай салмакта 80ге жакын балбан катышты.
Алмаз Эргешов 115 килограммдан жогорку салмакта жеңишке жетип, ушул жылдын октябрь айында Японияда өтө турган сумо күрөшү боюнча дүйнө жана Азия чемпионатына жолдомо алды.
Алмаз Эргешов Кыргызстандын беш жолку чемпиону, Азия чемпионатынын эки жолку жеңүүчүсү жана спорттун бул түрү боюнча көптөгөн эл аралык мелдештердин жеңүүчүсү.
Биздин Телеграм каналга катталыңыз
