Жогорку Кеңештин депутаты Дастан Бекешев Бишкекте жаңы жер алдындагы жөө адамдар өтүүчү өтмөктөрдү куруу планына сын айтты. Анын айтымында, долбоорлор мүмкүнчүлүгү чектелген адамдардын муктаждыктарын эске албайт.

«Жер алдындагы өтмөктөр мүмкүнчүлүгү чектелген адамдардын муктаждыктарын эске албай курулуп жатат. Алар түшүп-чыга албайт. Анан жолдон кантип өтөт, айтыңызчы?» — деди депутат өзүнүн Telegram-каналында.

Бекешев бул жолу шаар бийлиги чечимин кайра карап чыгып, ага кайрадан Башкы прокуратурага кайрылууга туура келбейт деген үмүтүн билдирди.

Анын пикиринде, мэриянын жана жергиликтүү өз алдынча башкаруу органдарынын ишине прокуратура тарабынан туруктуу көзөмөл болушу керек.

«Мен бир нерсени түшүндүм: мэриянын жана жалпысынан жергиликтүү өз алдынча башкаруу органдарынын ишине прокуратура тарабынан сапаттуу, так жана күн сайын жүргүзүлгөн көзөмөл керек», — деди ал.

Мисал катары депутат Жунусалиев көчөсүндөгү унаа токтотуучу чөнтөктөр боюнча жагдайды келтирди. Анын айтымында, буга чейин мэрия аларды бузууну талап кылган, бирок кийин прокуратура муниципалитеттин айрым талаптары мыйзамдар менен жөнгө салынбаганын аныктаган.

Мындан тышкары, Бекешев шаарды көрктөндүрүүдө кош стандарттар колдонулуп жатканын айтты.

«Бирөөгө болот, бирөөгө болбойт. Бирөөнү көзөмөлдөшөт, экинчисин көзөмөлдөшпөйт. Бирөөнү жазалашат, башкаларын тескерисинче колдошот», — деди ал.

Ошондой эле депутат 12-кичи райондогу соода күркөлөрүн бузуп, алардын ордуна сквер куруу планына да токтолду.

«Мен жашылдандырууну колдойм, бардык жерге жашыл көчөттөрдү отургузуу керек. Бирок аларды карап туруш керек. Эки отургуч коюп, брусчатка төшөп, жарык орнотуп коюу — бул сквер эмес. Биздин мэриянын чиновниктери сквер деген эмне экенин түшүнүгүн өзгөртүшү керек», — деп билдирди депутат.