Бишкек шаарынын мэриясы коомдук транспортто жол кирени накталай эмес төлөө системасын киргизүүгө даярдыктар улантылып жатканын билдирди. Учурда жүргүнчүлөр жол кирени «Тулпар» картасы, банктык карталар жана QR-код аркылуу төлөй алышат.

Эске салсак, буга чейин Бишкек мэри Айбек Жунушалиев 1-июлдан тарта коомдук транспорттордо накталай төлөм кабыл алынбай турганын билдирген.

Мэриянын маалыматында, накталай эмес эсептешүү жол коопсуздугун арттырууга багытталган жана айдоочулардын акча кабыл алууга алаксыбашына шарт түзөт.

«Тулпар» карталарын сатуу түйүндөрүнөн, терминалдардан жана мобилдик тиркемелер аркылуу сатып алууга жана толуктоого болот. Мэрия шаар тургундарын жана конокторун төлөмдүн накталай эмес ыкмаларын колдонууга чакырды.