Кыргызстандын президентине караштуу Тарых илимин өнүктүрүү боюнча комиссия кезектеги жыйынында «Кыргыздардын тарыхы» фундаменталдык академиялык басылмасынын кийинки томдорунун түзүмүн жана концепциясын карады. Бул тууралуу мамлекет башчысынын басма сөз кызматы билдирди.

Маалыматка ылайык, катышуучулар 16 томдук фундаменталдык академиялык басылманын 11-16-томдорунун түзүмүн жана концепциясын талкуулашты.

Жооптуу редакторлор даярдалган материалдарды сунуштап, бул томдордо чагылдырыла турган тарыхый доорлор, негизги тематикалык багыттар жана колдонулган булактар боюнча маалымат беришти.

Талкуунун жүрүшүндө комиссиянын мүчөлөрү кыргыз элинин тарыхынын илимий мезгилдештирилишин өркүндөтүү, айрым темаларды толуктоо, бөлүмдөрдүн түзүмүн жакшыртуу, архивдик, археологиялык жана жазма булактарды кеңири колдонуу, ошондой эле бардык томдордун концептуалдык жана логикалык бүтүндүгүн камсыз кылуу боюнча сунуштарын киргизишти.

Кыргызстандын мамлекеттик катчысы Арслан Койчиев көп томдук басылманы даярдоо мамлекеттик маанидеги стратегиялык илимий долбоор экенин жана аны ишке ашыруу үчүн президенттин тапшырмасы менен зарыл болгон финансылык каражаттар бөлүнгөнүн белгиледи.

Койчиев ошондой эле басылма жогорку академиялык стандарттарга жооп бериши, илимий тактыкка жана тарыхый калыстыкка негизделиши, ата мекендик тарых илимин өнүктүрүүгө, ошондой эле тарыхый мурастарды сактоого жана келечек муундарга өткөрүп берүүгө салым кошуусу керектигин баса белгиледи.