Кыргыз-Орус Славян университетинин студенти Бакайбек Жумабаев «Инновациялык экономикада каржыны башкаруу» аттуу бүкүл россиялык илимий-изилдөө иштеринин сынагынын I даражадагы лауреаты болду.

А.Н. Косыгин атындагы Россия мамлекеттик университети тарабынан уюштурулган сынак Россия менен Кыргызстандын жаш изилдөөчүлөрүнүн башын бириктирди. Калыстар тобунун кароосуна 50гө жакын билдирме түшүп, алардын ичинен Россиянын 24 жогорку окуу жайынын, бир колледждин жана КРСУнун студенттеринин 33 илимий иши тандалып алынган.

Катышуучулар каржыны башкаруу, инвестициялык саясат, экономикалык коопсуздук, санариптик рубль, ESG-трансформация, логистика, эмгек рыногу жана заманбап каржылык чечимдерди киргизүү маселелери боюнча изилдөөлөрүн сунушташты.

Сынактын жыйынтыгында Бакайбек Жумабаев А.Н. Косыгин атындагы Россия мамлекеттик университетинин жана В.Г. Тимирясов атындагы Казан инновациялык университетинин студенттери менен биргеликте I даражадагы лауреат аталды. Эксперттер катышуучулардын илимий даярдыгынын жогорку деңгээлин, изилдөөлөрдүн практикалык маанилүүлүгүн жана тандалган темалардын актуалдуулугун белгилешти.

Акыркы бир жыл ичинде КРСУ Кыргызстандагы алдыңкы окуу жайлардын бири катары позициясын бекемдеди. Университет Россия Федерациясы тарабынан каржыланган 555 бюджеттик орунга ээ болду, россиялык ЖОЖдор менен эл аралык кызматташтыкты кеңейтти, студенттик изилдөөлөрдү гранттык колдоону ишке киргизди, QS World University Rankings рейтингинде 200дөн ашык позицияга көтөрүлдү, ошондой эле окуу жайдын түзүмүн модернизациялоону жана заманбап университеттик кампусту курууну караган жаңы өнүктүрүү стратегиясын ишке ашырууга киришти.

Белгилей кетсек, КРСУнун студенттеринин жетишкендиктери бүтүрүү баскычында да улантылууда. 2026-жылы 1 128 бүтүрүүчү — университеттин 1 068 студенти жана КРСУ колледжинин 60 бүтүрүүчүсү диплом алышты. Диплом тапшыруунун салтанаттуу аземи ЖОЖдун 33 жылдык тарыхында биринчи жолу «Жаштык Аренанын» аянтчасында бирдиктүү жалпы университеттик майрам форматында өтүп, бүтүрүүчүлөрдүн, окутуучулардын, ата-энелердин, Кыргызстан менен Орусиянын мамлекеттик органдарынын өкүлдөрүнүн, университеттин өнөктөштөрүнүн жана ардактуу коноктордун башын бириктирди.

Билим берүү тууралуу документтерди бакалавриат, специалитет, магистратура, ординатура жана орто кесиптик билим берүү программаларынын бүтүрүүчүлөрү алышты, алардын арасында алган билимдерин кесиптик ишмердүүлүктө колдонууга даяр ар кандай тармактардын болочок адистери бар.