Бишкекте 17-сентябрда алгачкы 17 жаңы YUTONG автобусу каттамга чыгып, жүргүнчүлөрдү ташый баштады. Бул тууралуу борбор калаанын мэриясынан билдиришти.

Автобустар ишин эртең мененки саат 5:00дө баштады. Жаңы транспорттор №153 каттамга багытталды, ал эми буга чейин аталган каттамды тейлеп келген автобустар шаардын башка линияларына кайра бөлүштүрүлдү. Мэриянын демилгеси менен Бишкекке жалпысынан кондиционерлер менен жабдылган, узундугу 12 метрлик 95 жаңы YUTONG автобусу алып келинген.

Калган автобустар этап-этабы менен линияга чыгарылып, шаардын башка каттамдарына бөлүштүрүлөт.

Мэриядан белгилешкендей, жаңы транспорттун ишке киргизилиши борбор калаанын каттамдарындагы заманбап коомдук транспорттордун санын көбөйтүүгө, жүргүнчүлөр үчүн шарттарды жакшыртууга жана тейлөө сапатын жогорулатууга мүмкүндүк берет.