Бишкек шаарында жаранды 140 миң долларга алдап кеткен деп шектелип 44 жаштагы аял киши кармалды. Бул тууралуу Биринчи Май райондук ички иштер башкармалыгы билдирди.

Милициянын маалыматында, жаран арыз менен кайрылган. Анын айтымында, К.А. аттуу жаран июнь айында башка мамлекеттен товар алып келип сатууну убада кылып, андан 140 миң доллар алып, бирок милдеттенмесин аткарган эмес. Алган акчаны да кайтарып берген эмес.

Аталган факт боюнча Кылмыш-жаза кодексинин 209-беренеси («Алдамчылык») менен кылмыш иши козголгон.

Шектүү кармалып, Бишкек шаардык ички иштер башкы башкармалыгынын убактылуу кармоочу жайына киргизилди. Учурда тергөө иштери жүрүп жатканы айтылды.