Буга чейин дайынсыз жоголгон 13 жаштагы Сатаева Раяна 29-августта Чүй облусунун Сокулук районунун аймагынан табылды. Бул тууралуу Бишкектин Ленин райондук ИИБинен билдиришти.

Кызды жергиликтүү тургундардын бири көрүп калып, «102» кызматына кабарлаган. Милиция кызматкерлери кыраакылык көрсөткөн жаранга, ошондой эле баланы издөөгө жардам берген бардык жарандарга ыраазычылык билдиришти.

Эске салсак, Раяна 25-августта дайынсыз жоголгон. Саат 11:40 чамасында ал Ак-Босого конушундагы даректердин бирине келип, велосипедин ошол жерге калтырып, чыгып кеткен. Ошондон кийин анын жүргөн жери белгисиз болгон. Кыздын дайынсыз жоголгону тууралуу маалымат 26-августта милицияда катталып, тергөөгө чейинки текшерүү башталган.