15-октябрдан 17-октябрга чейин Бишкекте өтө турган эки эл аралык көргөзмөгө 500дөн ашык ата мекендик жана чет өлкөлүк компаниялар катышат. Бул тууралуу Кыргызстандын Соода-өнөр жай палатасы (СӨП) билдирди.

СӨП алгачкы жолу бир аянтчада «Кыргызстан ЭКСПО — 2026» жана II Эл аралык «EXPO EURASIA KYRGYZSTAN — 2026» өнөр жай көргөзмөсүн бириктирет. Алар «Жаштык Аренада» өткөрүлөт. Экспозициялар үчүн 3 миң чарчы метрден ашык аянт бөлүнөт.

Компаниялар технологиялык чечимдерди, өнөр жай жабдууларын, товарларды жана кызматтарды тартуулашат. Уюштуруучулардын болжолдоосу боюнча, үч күндүн ичинде көргөзмөгө 3 миңден ашык тармактык адистер, инвесторлор жана компания жетекчилери келет.

Иш-чарага Кытай, Корея, Жапония, Россия, Казакстан, Өзбекстан, Беларусь, Тажикстан, Түркия жана башка мамлекеттердин өкмөттүк жана бизнес-делегацияларынын, соода-өнөр жай палаталарынын жана венчурдук фонддорунун өкүлдөрү катышуусу күтүлүүдө.

Уюштуруучулар бул аянтча компанияларга потенциалдуу өнөктөштөр менен түз байланыш түзүүгө, жаңы рынокторго чыгууну, продукция жеткирүүнү жана биргелешкен долбоорлорду ишке ашырууну талкуулоого шарт түзөт деп ишенишет.

Иштиктүү программага өзгөчө көңүл бурулат. Көргөзмөлөрдүн алкагында B2B жана B2G жолугушуулары өтүп, анда бизнес өкүлдөрү бири-бири менен жана мамлекеттик түзүмдөр менен түз сүйлөшүүлөрдү жүргүзө алышат. Ошондоо эле инвестициялык долбоорлордун презентациялары болот.

Мындан тышкары, курулуш, автомобиль тармагы, өнөр жай, мунай сектору жана тоо-кен тармагы боюнча беш тармактык ишкерлер кеңешинин жыйындары пландаштырылган.

Бул аянтчаларда бизнес өкүлдөрү, мамлекеттик органдар жана чет өлкөлүк инвесторлор тармактык стратегияларды, инвестициялык демилгелерди, учурдагы тоскоолдуктарды жана биргелешкен долбоорлорду баштоо мүмкүнчүлүктөрүн талкуулашат.

«Эки негизги көргөзмөнү жана тармактык ишкерлер кеңештерин бир аянтчада бириктирүү бизнес үчүн уникалдуу мүмкүнчүлүктөр терезесин ачат: үч күндүк интенсивдүү иштин алкагында компаниялар кадимки режимде уюштуруу үчүн айлап убакыт талап кылынган деңгээлдеги сүйлөшүүлөрдү жүргүзө алышат», — деп белгилешти СӨПтүн уюштуруу комитетинен.

Палатанын маалыматы боюнча, форум келишимдерди түзүүгө, экспорт-импорт байланыштарын өнүктүрүүгө жана экономиканын ар кандай секторлорунда өнөктөштөрдү издөөгө багытталган. Алардын катарында — энергетика, агроөнөр жай комплекси, медицина жана IT тармагы бар.

Расмий ачылышы 2026-жылдын 15-октябрында саат 10:00дө Бишкек шаары, Тоголок Молдо көчөсү, 17/7 («Жаштык Арена») дарегинде болот.

Стенддерди брондоо, катышуу жана аккредитациялоо маселелери боюнча телефон/WhatsApp: +996 554 881 777 (СӨПтүн «Кыргызэкспоцентри») номерине кайрылсаңыздар болот.