Панфилов атындагы паркта жаңы амфитеатр ачылды. Ачылыш аземине Бишкек шаарынын мэри Айбек Жунушалиев катышты. Мэриянын маалыматына ылайык, бул аянтчада жума жана ишемби күндөрү артисттердин, элдик өнөрпоздордун жана мэрия уюштурган концерттик программалардын катышуусунда иш-чаралар өткөрүлүп турат. Ал эми калган күндөрү амфитеатрды коомдук жана маданий иш-чаралар үчүн пайдаланууга болот. Бул ар кайсы муундун өкүлдөрүн бириктирген эс алуу жана иш-чараларды өткөрүү үчүн ачык мейкиндик.

Мэр мындай коомдук жайларды түзүү шаарды көрктөндүрүү менен гана чектелбестен, шаар тургундарынын руханий өнүгүүсүнө, маданий салттарды сактоого жана бош убакытты пайдалуу өткөрүүгө да багытталганын белгиледи.

«Биздин милдет — көчөлөрдү өнүктүрүүгө, мектептерди жана инфраструктураны курууга гана эмес, шаар тургундарынын руханий өнүгүүсүнө да көңүл буруу. Борбор калаанын тургундары жана коноктору бул жерге келип, эс алып, музыкадан жана маданий иш-чаралардан ырахат алышын каалайбыз», — деди Жунушалиев.

Ал буга чейин паркта көптөгөн шаар тургундарынын жылуу эскерүүлөрүнө айланган музыкалык жана бий иш-чаралары өткөрүлүп келгенин эске салды. Анын айтымында, амфитеатр ошол салттарды кайра жандандырып, кийинки муундарга өткөрүп берүүгө мүмкүнчүлүк түзөт.