Бишкекте Тоголок Молдо көчөсүндөгү жаңжалдын эки катышуучусу майда бейбаштык үчүн жоопкерчиликке тартылды. Бул тууралуу Биринчи май райондук ички иштер башкармалыгынын (РИИБ) басма сөз кызматынан билдиришти.

Милициянын маалыматына караганда, 13-августта социалдык тармактарда эки жарандын ортосунда пикир келишпестиктен улам чыккан жаңжалдын видеосу тараган.

Милиция кызматкерлери жаңжалдын катышуучуларынын өздүгүн аныкташты. Алар 1999-жылы туулган Л. М. жана 1992-жылы туулган А. Д. экени белгилүү болду. Экөө тең Биринчи май РИИБге жеткирилди.

Аларга карата КР Укук бузуулар жөнүндө кодексинин 126-беренеси («Майда бейбаштык») боюнча протоколдор түзүлдү.

Материалдар кароо үчүн райондук сотко жөнөтүлдү.