Бишкекте коомдук транспорт үчүн дагы эки көчөдө атайын бөлүнгөн тилкелерди уюштуруу пландалууда. Бул тууралуу Бишкек мэриясынын Транспорт жана жол-транспорттук инфраструктураны өнүктүрүү департаменти Reporter.kgнин суроосуна жооп берип жатып билдирди.

Департаменттин маалыматына ылайык, жакынкы мезгилде бөлүнгөн тилкелер төмөнкү участоктордо уюштурулат:

• Чүй проспектисинде — Лермонтов көчөсүнөн Ибраимов көчөсүнө чейин;
• Курманжан Датка көчөсү / 7-Апрель көчөсүндө — Анкара көчөсүнөн Жибек Жолу проспектисине чейин.

Мындан тышкары, учурда дагы эки участокто коомдук транспорт үчүн бөлүнгөн тилкелерди уюштуруу мүмкүнчүлүгү каралууда:

• Жусуп Абдрахманов көчөсүндө (Байтик Баатыр көчөсүнө уланган бөлүгүндө) — Аалы Токомбаев көчөсүнөн Жумабек көчөсүнө чейин;
• Чыңгыз Айтматов проспектисинде — Анкара көчөсүнөн Иса Ахунбаев көчөсүнө чейин.

Департаментте белгилешкендей, мындай тилкелер коомдук транспорттун ишинин натыйжалуулугун жогорулатуу, анын жүрүү убактысын кыскартуу жана жүргүнчүлөр үчүн ыңгайлуу шарттарды түзүү максатында уюштурулууда. Акыркы чечимдер транспорттук талдоонун жыйынтыктарынын жана тиешелүү мамлекеттик органдардын сунуштарынын негизинде кабыл алынат.

Учурда коомдук транспорт үчүн бөлүнгөн тилкелер Киев көчөсүндө — Жусуп Абдрахманов көчөсүнөн Жаш Гвардия бульварына чейин, Москва көчөсүндө — Ибраимов көчөсүнөн Жаш Гвардия бульварына чейин, Иса Ахунбаев көчөсүндө — Байтик Баатыр көчөсүнөн Чыңгыз Айтматов проспектисине чейин, ошондой эле Жибек Жолу проспектисинде — Тоголок Молдо көчөсүнөн Осмонкул көчөсүнө чейин уюштурулган. Бул тилкелер жолдун эки тарабында сары түстөгү атайын жол белгилери менен белгиленген.