Кыргызстандын президенти Садыр Жапаров менен Россиянын президенти Владимир Путин Ысык-Көлдө ачылган VII Кыргыз-Орус экономикалык форумунун жана Аймактар аралык конференциянын катышуучуларына видео кайрылуу жасашты.

Жапаров Ысык-Көл кайрадан эки өлкөнүн мамлекеттик органдарынын, аймактарынын, ишкер чөйрөлөрүнүн жана эксперттик коомчулугунун өкүлдөрүнүн жолугушуучу жайына айланганын, ал эми форум менен конференция өткөрүлгөн жылдар ичинде диалог жүргүзүү жана өз ара байланыштарды чыңдоо үчүн суроо-талапка ээ болгон аянтчага айланганын белгиледи. Ал Россияны Кыргызстандын стратегиялык өнөктөшү жана союздашы деп атап, 2025-жылдын жыйынтыгы боюнча өлкөлөр ортосундагы соода жүгүртүү 4 миллиард долларга жакындаганын, ал эми республикада россиялык капиталдын катышуусу бар ишканалардын саны 1800дөн ашканын эске салды.

Кыргызстандын президенти өлкө 2030-жылга чейинки Улуттук өнүктүрүү программасынын алкагында экономиканы модернизациялоонун масштабдуу программасын ишке ашырып жатканын жана россиялык рынокту ата мекендик продукцияны жылдыруу үчүн негизги багыттардын бири катары карарарын айтты. Ал россиялык өнөктөштөрдү ири долбоорлорго — «Тамчы» атайын аймагын өнүктүрүүгө, «Ала-Тоо Резорт» айыл чарба-туристтик кластерине, ошондой эле энергетика, өнөр жай жана логистика тармагындагы жаңы долбоорлорго жигердүү катышууга чакырды. Өзүнчө Жапаров Кыргыз-Орус өнүктүрүү фондун кошумча капиталдаштыруу чечимин белгиледи, анын айтымында, бул жаңы инвестициялык демилгелерге жол ачат.

Путин өз кезегинде Жапаровго форумду жана конференцияны жеке колдоосу үчүн ыраазычылык билдирип, Ысык-Көлдө эки өлкөнүн миңден ашуун өкүлү — аймактардын башчылары, бийлик органдарынын жетекчилери, ишкерлер, окумуштуулар жана өнүктүрүү институттарынын өкүлдөрү чогулганын белгиледи. Ал 2025-жылдын жыйынтыгы боюнча өлкөлөр ортосундагы соода жүгүртүү 26%га өскөнүн эске салды.

Россиянын президенти Кыргызстанда учурда россиялык капиталы бар эки миңден ашуун компания иштеп жатканын, ал эми Россия республиканын энергетикалык инфраструктурасын өнүктүрүүгө жигердүү катышып жатканын айтты — бул жылы Ысык-Көлдө кубаттуулугу 300 мегаватт болгон күн электр станциясын ишке киргизүү пландалууда жана ошол эле аймакта шамал электр станциясын куруу даярдалууда. Путин ошондоо эле эки өлкөнүн гуманитардык кызматташтыгын эске салды: Кыргызстанда орус тилинде окуткан тогуз мектептин жана Бишкектеги Славян университетинин кампусунун курулушу уланууда, ал эми Нижний Новгороддо маалыматтык технологиялар жана киберкоопсуздук боюнча биргелешкен окуу борборун ачуу пландалууда.

Эки мамлекет башчысы форумдун жана конференциянын катышуучуларына жемиштүү иш жана биргелешкен демилгелерди ийгиликтүү ишке ашырууну каалашты.