Бишкек шаарында баңгизат колдонууга азгыруу фактысы боюнча 34 жаштагы К.Ж. аттуу жаранды кармалды.

Ленин райондук ИИБдин маалыматында, милицияга Матыева көчөсүндөгү үйлөрдүн биринде жаран кыздарга баңгизат берип жатканы тууралуу маалымат түшкөн. Көрсөтүлгөн даректен эки кыз жана бир жигит кармалып, милиция бөлүмүнө жеткирилген.

Медициналык текшерүүнүн жыйынтыгында аталган адамдар баңгизаттын бир нече түрүн колдонгону аныкталган. Ошодой эле баңгизат колдонууга азгырылгандыгын көрсөткөн маалыматтар алынган.

Аталган факт боюнча Кылмыш-жаза кодексинин “Баңгизат каражаттарын колдонууга көндүрүү” беренеси менен кылмыш иши козголгон. Азгырууга шектүү Бишкек шаардык ИИББнын убактылуу кармоочу жайына киргизилген.